Sa isang cooking class sa Brahma Kumaris Center (Kamuning rd. cor T. Gener, Quezon City) kapansin-pansin na sa loob ng kulang-kulang dalawang oras, naituro at naipakita ang pagluluto ng anim na recipes na vegetarian. Mga pagkaing walang karne. Magaan ang daloy ng pagtuturo, at masaya ang lahat. At sa dami ngtaong dumalo masasabing dumadami ang mga pinoy na vegetarian.

20,000 kilo ng dumi araw-araw

          Pero kung ang awa sa hayop ay hindi sapat, maaaring subukan ng isang tao ang maawa sa sarili. Sa mga pag-aaral, lumalabas na ang katawan ng tao ay hindi angkop sa pagkain ng karne. Ang mga hayop gaya ng tigre, leon, pusa, aso, ay maraming imbak na hydrochloric acid sa tiyan para tunawin ang karne. Ngunit ang tiyan ng tao ay 20 beses na mas kaunti ang lamang hydrochloric acid kayat hirap itong lusawin ang karne. Dagdag pa, ang bituka ng leon, tigre, pusa, aso ay tatlong ulit (3x) na kasinghaba ng kanilang katawan. Kaya’t mabilis nilang nailalabas ang sapal ng karne. Pero ang bituka ng tao ay labindalawang ulit (12x) na kasing haba ng kanyang katawan. Kaya’t matagal bago niya mailabas ang sapal ng karne. Nabubulok na ang karne sa loob ng kanyang bituka, na siya namang pinagmumulan ng sari-saring karamdaman. Mahaba ang listahan ng mga sakit na direktang mai-uugnay sa pagkain ng karne. Kawawa ang katawan ng tao.

          Ngunit kung hindi pa rin sapat ‘yan, maaari nating subukang maawa sa ating mga anak. Dahil mamanahin ng mga bata ngayon ang mundo, tignan natin ang antas ng polusyon sa ating paligid. Anong klaseng mundo o kapaligiran ang mamanahin nila? Ang industriya ng karne (baboy, baka, manok, atbp.) ang isa sa pinaka-malakas lumikha ng polusyon sa mundo. Halimbawa ang isang babuyan sa Sta Maria Bulacan. Nasa gilid ng kalye papuntang San Jose del Monte City. Sa gilid ng babuyan ang isang bangin, at sa ilalim ay may ilog. Katabi din ang tulay sa ibabaw ng ilog.

          Sa isang balita sa TV lumalabas na may 10,000 baboy ang pinatataba duon. At dahil patabain ang mga baboy, sila ay pinakakain ng tuloy-tuloy, kaya naman tuloy-tuloy din ang kanilang pagdumi. Sa loob ng 24 na oras, ang bawat baboy ay dumudumi ng di kukulangin sa dalawang kilo. Kaya’t ang 10,000 baboy ay lumilikha ng 20,000 kilo ng ebak (dumi), araw-araw. ‘Yan ay dalawang metric tons araw-araw. Tuwing dumadaan ang bus sa harap ng babuyan talagang nagtatakip kami ng ilong sa tindi ng baho. Ang mga bahay sa tapat ay nakasaradong lahat ang bintana at ayon sa balita, marami sa mga residente ay may sakit sa baga. Walang reklamo ang kapitan ng barangay dahil lagi naman daw siyang binibigyan ng litson ng management ng babuyan.

Pagbibigay-buhay

          Ipinakita din sa TV ang waste treatment ponds ng babuyan. Dalawang hukay na parang pala-isdaan sa likod ng higanteng kulungan. Sa mga ito raw nililinis ang dumi ng mga baboy. Ngunit ayon sa mga environmentalist na nag-imbestiga, hindi kakayaning linisin ng mga ito ang dalawang metric tons na dumi ng baboy araw-araw. Masyadong marami. Tatagas at tatagas ang ebak. Lalo na kapag umulan ng malakas at mapuno ang ponds. Ang pinakahuling hantungan ng latak ng dumi ng baboy ay nasa tabi-tabi lang. Kataka-taka ba kung bakit kulay itim ang ilog sa tabi ng babuyan? Ilang kabataan na ang nagkasakit tapos maligo duon. At ayon sa mga nag-testing ng tubig sa ilog, puno ito ng bacteria. Maituturing nang patay ang ilog. Isang babuyan pa lang yan. E higit isang dosena ang malalaking babuyan sa Bulacan. Kaya naman malaking bahagi ng river system ng lalawigan ay kontaminado na.

          Suriin niyo ang mga manukan, bakahan, babuyan, pala-isdaan na malapit sa inyo, at mararanasan nyo ang polusyon sa hangin, tubig at lupa sa paligid nito. Kawawa ang kapaligiran, ang mundo.

          Ang salitang vegetarian ay galing sa latin, vegetare. Ibig sabihin ay magbigay buhay, sa ingles “to enliven.” Ang pagkaing vegetarian ay nagbibigay buhay sa ating katawan, sa mga hayop, sa kapaligiran. Higit sa lahat nabibigyang buhay ang ating kakayahang makaramdam ng awa o compassion para sa lahat ng nilalang, sa lahat ng oras.

          Si Jojo ay naging cook ng isang meditation center kung saan bawal ang karne.

Bagong taon ay magbagong menu

Walang Karneng Veggie Paella

Mga sangkap

3 ½ c long grain rice (mas ok kung basmati) Hing

1 tbsp chopped celery

½ c diced red & green pepper

½ tsp paprika

½ tsp thyme

½ tsp ground pepper

½ kilo button mushroom

½ kg oyster mushroom

½ kg veggie hotdog

1 c tomato sauce

2 tbsp kasubha

1 tsp rock salt

½ c green peas

6 c vegetable stock (or water)

1/3 c cooking oil (olive oil sana)

Pagluluto

Hugasan ang bigas at tanggalan ng tubig. Ipandilig ang hugas bigas sa paboritong halaman.

          Initin sa wok ang olive oil, hing, celery, mushrooms, veggie hotdog. Ihalo ang mga spices - ground pepper, paprika, thyme, kasubha, rock salt at idagdag ang tomato sauce at ang hinugasang bigas. Haluin ilang minuto. Isama ang vegetable stock, at ilagay sa rice cooker at isama ang green peas.

Note : ang hing ay pulbos na mabibili sa mga Indian stores. Pero kung gusto ninyo pwedeng gamitin ang bawang at sibuyas na panggisa imbes na hing. Marami ding mabibiling veggie hotdog sa mga health foodstores o tindahan ng mga Seventh Day Adventists. Ang pagluluto ay isang art form na malaya. Huwag matakot mag-eksperimento.

Eggless Fruit Cake

Mga sangkap

DRY

500 gms. whole wheat flour

3 c. brown sugar

2 tsp. baking soda

1 tsp salt

WET

2 c. overripe banana (“bungulan” kung meron)

1 c. milk (evaporated)

2 tsp. vanilla

1 c corn oil (no shortening or lard)

Pagluluto

Paghaluin sa bowl ang mga dry ingredients tapos ay itabi. Paghaluin din sa isa pang bowl ang wet ingredients hanggang ang oil ay hindi na nakahiwalay.

Paghaluin ang wet at dry ingredients. Haluin ng husto pero ingatan na huwag sumobra ang paghalo, dahil baka maging pudding ang fruit cake. Gamitin ang teknik na “folding” sa paghahalo. Itanong sa pinaka-malapit na panadero ang teknik na ito.

Lagyan ang pan ng butter para huwag manikit ang mix. At ihanda ang oven sa 300 degrees farenheit. Isalin ang mix sa pan, at saka ipasok sa oven. Kapag umalsa na ang mix, testingin sa pamamagitan ng pagtusok ng toothpick. Kapag hinugot nyo at walang nanikit sa toothpick ibig sabihin ay luto na ang inyong fruit cake.